រាជធានីភ្នំពេញ ៖ ប្រធានមន្ទីរធនធានទឹក និងឧតុនិយមរាជធានីភ្នំពេញបានលើកឡើងថា គិតមកដល់ត្រឹម ព្រឹកថ្ងៃទី១២ ខែតុលា ឆ្នាំ២០២១នេះ ស្ថានភាពទឹកនៅស្ទឹងព្រែកត្នោតបានចាប់ផ្ដើមស្រក យ៉ាងខ្លាំង ហើយបើទោះបីជាមានការស្រកចុះយ៉ាងណាក្ដី ក៏មន្ទីរជំនាញ និងអាជ្ញាធរ ដែនដីនៅតែបន្តត្រៀម បង្ការទប់ស្កាត់គ្រោះមហន្តរាយដែលអាចកើតឡើងជានិច្ច។លោក ម៉ៅ ប៊ុនធឿន ប្រធានមន្ទីរធនធានទឹកនិងឧតុនិយមរាជធានីភ្នំពេញ បានបញ្ជាក់ឱ្យដឹងនៅព្រឹកថ្ងៃទី១២ ខែតុលា ២០២១នេះថា ស្ថានភាពទឹកនៅស្ទឹងព្រែកត្នោត បានស្រកចុះរហូតដល់១ម៉ែត្រ សម្រាប់ថ្ងៃទី១២ ខែតុលានេះ ពោលគឺទឹកបានស្រកព្រមៗគ្នាទាំងកម្ពស់ទឹក នៅខេត្តកំពង់ស្ពឺ កម្ពស់ទឹកនៅខេត្តកណ្ដាល និងកម្ពស់ទឹកនៅរាជធានីភ្នំពេញ។ លោកបានបន្ដថា សម្រាប់ថ្ងៃទី១២ ខែតុលានេះកម្ពស់ទឹក នៅចំណុចស្ពានឃ្លៃ មានកម្ពស់៤,២០ម៉ែត្រ ស្រកចុះ០,៥ម៉ែត្រ បើប្រៀបធៀបកាលពីម្សិលមិញ ចំណុច រលាំងជ្រៃ កម្ពស់ទឹក៦,៩០ម៉ែត្រ ស្រកចុះ០,០២ម៉ែត្រ បើប្រៀបធៀបកាលពីម្សិលមិញ។ ចំពោះទឹកស្ពានកំពង់ទួល (ស្ពាន៧មករា) កម្ពស់ទឹក៦,២០ម៉ែត្រ ស្រកចុះ១ម៉ែត្រ បើប្រៀបធៀបកាលពីម្សិលមិញ។លោកប្រធានមន្ទីរបន្តទៀតថា ស្ថានភាពទឹកនៅពេលនេះ មិនមានអ្វីជាបញ្ហានោះទេ ប៉ុន្តែយើងនៅតែសង្កេតមើលតាមដានស្ថានភាពទឹក និងអាកាសធាតុបន្តទៀត។ ចំពោះវិធានការបង្ការទប់ស្កាត់គ្រោះទឹកជំនន់នេះ មន្រ្ដីជំនាញនៅតែបន្តត្រៀមដដែល ទៅតាមការណែនាំរបស់ ឯកឧត្ដម ឃួង ស្រេង អភិបាល នៃគណៈអភិបាលរាជធានីភ្នំពេញ ដោយក្នុងពេលនេះ មន្ទីរធនធានទឹកនិងឧតុនិយមរាជធានីភ្នំពេញ បានលើកកូនទំនប់តូចមួយនៅលើទំនប់ចាស់ដើម្បីការពារទឹកជំនន់ដែលសកម្មភាពនេះ បាននិងកំពុងធ្វើសកម្មភាពយ៉ាងមមាញឹក ។ លោកប្រធានមន្ទីរបានបន្ថែមថា មន្ទីរធនធានទឹក នៅតែបន្ដតាមដានមើលស្ថានភាពទឹកជាប្រចាំ ក្នុងខណៈពេលមានបញ្ហាអ្វីកើតឡើង គឺអាចផ្ដល់ព័ត៌មាន ឬជួយសង្គ្រោះបងប្អូនប្រជាពលរដ្ឋបានទាន់ពេល និងមិនបង្កឱ្យខូចខាតទ្រព្យសម្បត្តិផងដែរ៕
ព័ត៌មានគួរចាប់អារម្មណ៍
ចាប់ឃាត់ខ្លួនជនសង្ស័យ១នាក់ ពាក់ពន្ឋ័ករណីលួច (ខ្មែរថ្ងៃនេះ)
កាំកុងត្រូលខេត្តកណ្ដាល ចុះត្រួតពិនិត្យទំនិញហួសកាលបរិច្ឆេទ និងខូចគុណភាព ដាក់លក់នៅផ្សាររកាកោង (ខ្មែរថ្ងៃនេះ)
រដ្ឋបាលខេត្តស្ទឹងត្រែង បើកវេទិការផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត សម្រាប់អាណត្តិទី៣ ឆ្នាំ២០១៩ នៅក្នុងស្រុកសៀមប៉ាង (ខ្មែរថ្ងៃនេះ)
ចាប់ឃាត់ខ្លួនជនសង្ស័យម្នាក់ ពាក់ព័ន្ធករណីគ្រឿងញៀន (ខ្មែរថ្ងៃនេះ)
ឃាត់ខ្លួនប៉ូលីសក្លែងក្លាយ ពាក់ឯកសណ្ឋានស័ក្តិ៣ ធ្វើសកម្មភាពឆែកឆេរសម្ភារៈ និងគំរាមពិនិត្យទឹកនោមរកសារធាតុញៀន ទៅលើយុវជនម្នាក់ នៅភ្នំពេញ (ខ្មែរថ្ងៃនេះ)
វីដែអូ