ខេត្តព្រះសីហនុ ៖ ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានមានប្រសាសន៍ សម្ដែងនូវមោទកភាពចំពោះសមិទ្ធផលហេដ្ឋារចនាសម្ព័ន្ធក្នុង ខេត្តព្រះសីហនុមានតម្លៃជាង ៣០០លានដុល្លារអាម៉េរិក ដែលកើតចេញពីការវិនិយោគផ្ទាល់របស់កម្ពុជាខ្លួនឯង។ក្នុងពិធីសម្ពោធដាក់ឱ្យប្រើប្រាស់ជាផ្លូវការផ្លូវចំនួន ៣៧ខ្សែ និងអាងប្រព្រឹត្តិកម្មទឹកកខ្វក់ចំនួន២កន្លែង នៅខេត្តព្រះសីហនុ នាព្រឹកថ្ងៃព្រហស្បតិ៍ ១៣រោច ខែកត្តិក ឆ្នាំឆ្លូវ ត្រីស័ក ព.ស. ២៥៦៥ ត្រូវនឹង ថ្ងៃទី០២ ខែធ្នូ ឆ្នាំ២០២១ សម្ដេចតេជោ ហ៊ុន សែន មានប្រសាសន៍ថា យើងពិតជាមានមោទនភាព ដែលយើងបានកសាងនូវសមិទ្ធផលនេះឡើង ហើយជាលើកដំបូងដែលយើងប្រើការវិនិយោគផ្ទាល់រហូតដល់ជាង៣០០លារដុល្លារសហរដ្ឋអាមេរិកនៅក្នុងទីក្រុងមួយនេះ។សម្តេចតេជោថ្លែងថា ក្នុងចក្ខុវិស័យកសាងផ្លូវនេះ មិនត្រឹមតែសម្រាប់ធ្វើដំណើរប្រកបដោយប្រសិទ្ធភាពប៉ុណ្ណោះទេ ថែមទាំងផ្លូវជាលំហរសាធារណៈប្រកបដោយមេត្រីភាព សុវត្ថិភាព និងសមធម៌ ផ្លូវនៃការជំរុញកំណើនសេដ្ឋកិច្ច ផ្លូវនៃការលើកកម្ពស់គុណភាពនគរូបនីយកម្ម និងភាពធន់មាំទាក់ទងអាកាសធាតុ និងបរិស្ថាន សក្តិសមជាទីក្រុងទំនើបមានផាសុកភាពសម្រាប់ការរស់នៅទេសចរណ៍ និងការអភិវឌ្ឍសេដ្ឋកិច្ច។សម្ដេចតេជោគូសបញ្ជាក់ថា ដូច្នេះប្រសិនបើយើងមិនយកការសម្រេចចិត្តដាក់ទុនមួយ ហើយធានាឱ្យបានរយៈពេល ២០ ឬ៣០ឆ្នាំ ក្រោយនោះ គឺយើងធ្វើមិនចប់នោះទេ។ ដូច្នេះហើយបានជាយើងមានតម្រូវការដាក់ទុនធំ ដើម្បីកសាងហេដ្ឋារចនាសម្ព័ន្ធនៅក្នុងខេត្តព្រះសីហនុរបស់យើងនេះ ដែលយើងចង់កសាងខេត្តមួយនេះទៅជាខេត្តពហុបំណង ដែលវានឹងទៅជាខេត្តនាំមុខដោយការកើនឡើងនៃសេដ្ឋកិច្ចរបស់កម្ពុជា។សម្ដេចតេជោនាយករដ្ឋមន្ត្រីលើកឡើងថា ថ្ងៃនេះខេត្តព្រះសីហនុ បានប្រែប្រួលមុខមាត់យ៉ាងធំ ដែលមាអគារកម្ពស់រាប់សិបជាន់បានកើតយ៉ាងច្រើននៅក្នុងទីក្រុមួយនេះ វាសក្ដិសមជាមួយនឹងការដែលយើងត្រូវធ្វើហេដ្ឋារចនាសម្ព័ន្ធឱ្យបានរឹងមាំ។សម្ដេចតេជោថ្លែងសង្កត់ធ្ងន់ថា «នេះគឺជាការវិនិយោគខ្នាតធំមួយ ហើយយើងក៏មានគម្រោងវិនិយោគទីកន្លែងដទៃទៀត ដែលឥឡូវយើងកំពុងតែដាក់ទុនវិនិយោគនៅក្នុងខេត្តសៀមរាប»។ «ប៉ុន្តែដូចដែលខ្ញុំបាននិយាយកាលពីពេលមុន គម្រោងវិនិយោគរបស់យើងត្រូវបានអាក់ខាន ដោយការរំខានរបស់កូវីដ-១៩ ដែលមកដល់ពេលនេះយើងបានចំណាយប្រាក់សន្សំរបស់យើង ប្រមាណជា ២ ៥០០ លានដុល្លារអាម៉េរិក ដើម្បីយកទៅសង្គ្រោះប្រជាពលរដ្ឋនៅក្នុងដំណាក់កាលកូវីដ។ ប្រសិនបើមិនមានកូវីដ-១៩ទេ យើងមានសមត្ថភាព មកដល់ពេលនេះ ខ្ញុំប៉ាន់ស្មានថា ប្រាក់សន្សំរបស់យើងមិនតិចជាង ៥ ០០០ លានដុល្លារទេ ប៉ុន្តែកូវីដមិនត្រឹមតែកាត់បន្ថយប្រាក់សន្សំរបស់យើងកើនឡើងទេ តែធ្វើឱ្យប្រាក់សន្សំរបស់យើងមានការធ្លាក់ចុះទៅវិញ។ តែយើងសង្ឃឹមថា បន្ទាប់ពីការបើកប្រទេសឡើងវិញនេះ ចំណូលជាតិឃើញថាមានការកើនឡើងយ៉ាងច្បាស់»។ ឯកឧត្តមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ និងជាប្រធានគណៈកម្មាធិការជាតិគ្រប់គ្រងតំបន់ឆ្នេរបានឱ្យដឹងថា ការកសាងផ្លូវចំនួន ៣៧ ខ្សែ ក្នុងខេត្តព្រះសីហនុ គឺជាគំនិតផ្ដួចផ្ដើមរបស់សម្ដេចតេជោនាយករដ្ឋមន្ត្រី កាលពីថ្ងៃទី៣០ ខែសីហា ឆ្នាំ២០១៩ ដើម្បីកែលម្អខ្សែផ្លូវមេយុទ្ធសាស្ត្រនៃប្រព័ន្ធនគរូបនីយកម្មគមនាគមន៍ ដឹកជញ្ជូន សេដ្ឋកិច្ច ធុរកិច្ច និងទេសចរណ៍ នៃខេត្តព្រះសីហនុ សំដៅរួមចំណែកកាត់បន្ថយភាពក្រីក្រ លើកកម្ពស់កម្រិតជីវភាពរស់នៅរបស់ប្រជាពលរដ្ឋ និងលើកម្ពស់សោភ័ណភាពរបស់ខេត្ត។ការស្ថាបនាផ្លូវនេះ បានរួមចំណែកដ៏ធំធេងនៅក្នុងការសម្រេចនូវចក្ខុវិស័យរបស់រាជរដ្ឋាភិបាល ដែលបានកំណត់នៅក្នុងផែនការរៀបចំនៃខេត្តព្រះសីហនុ ចក្ខុវិស័យឆ្នាំ២០៣០ សំដៅអភិវឌ្ឍខេត្តព្រះសីហនុ ដែលជាប៉ូលអភិវឌ្ឍជាតិប្រកបទៅដោយចីរភាពនៅតំបន់ឆ្នេរសមុទ្រកម្ពុជា ឱ្យក្លាយទៅជាតំបន់សេដ្ឋកិច្ចពិសេសគំរូពហុបំណង មជ្ឈមណ្ឌលកំណើនជាតិ និងមជ្ឈមណ្ឌលភស្តុភាកម្មជាតិ តាមរយៈការអភិវឌ្ឍទីក្រុងឆ្លាត និងការធ្វើសមាហរណកម្មតំបន់ឆ្នេរសមុទ្រកម្ពុជា។ គម្រោងហេដ្ឋារចនាសម្ព័ន្ធផ្លូវនៅក្នុងខេត្តព្រះសីហនុ បានបើកការដ្ឋានសាងសង់កាលពីថ្ងៃទី ១៦ ខែវិច្ឆិកា ឆ្នាំ២០១៩ និងបានបញ្ចប់ការដ្ឋានកាលពីថ្ងៃទី០ ១ ខែមេសា ឆ្នាំ២០២១ មានប្រវែងសរុប ៨៤គីឡូម៉ែត្រ សាងសង់ដោយអង្គភាព និងក្រុមហ៊ុនចំនួន ៨ និងបែងចែកចេញជាបីប្រភេទ រួមមាន មហាវិថីចំនួន៣ខ្សែ ប្រវែង២០,៨គីឡូម៉ែត្រ វិថីចំនួន ១៥ខ្សែប្រវែង ៥០,៣ គីឡូម៉ែត្រ និងអនុវិថី១៩ ខ្សែប្រវែង ១២,៨ គីឡូម៉ែត្រ៕
ព័ត៌មានគួរចាប់អារម្មណ៍
ចាប់ឃាត់ខ្លួនជនសង្ស័យ១នាក់ ពាក់ពន្ឋ័ករណីលួច (ខ្មែរថ្ងៃនេះ)
កាំកុងត្រូលខេត្តកណ្ដាល ចុះត្រួតពិនិត្យទំនិញហួសកាលបរិច្ឆេទ និងខូចគុណភាព ដាក់លក់នៅផ្សាររកាកោង (ខ្មែរថ្ងៃនេះ)
រដ្ឋបាលខេត្តស្ទឹងត្រែង បើកវេទិការផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត សម្រាប់អាណត្តិទី៣ ឆ្នាំ២០១៩ នៅក្នុងស្រុកសៀមប៉ាង (ខ្មែរថ្ងៃនេះ)
ចាប់ឃាត់ខ្លួនជនសង្ស័យម្នាក់ ពាក់ព័ន្ធករណីគ្រឿងញៀន (ខ្មែរថ្ងៃនេះ)
ឃាត់ខ្លួនប៉ូលីសក្លែងក្លាយ ពាក់ឯកសណ្ឋានស័ក្តិ៣ ធ្វើសកម្មភាពឆែកឆេរសម្ភារៈ និងគំរាមពិនិត្យទឹកនោមរកសារធាតុញៀន ទៅលើយុវជនម្នាក់ នៅភ្នំពេញ (ខ្មែរថ្ងៃនេះ)
វីដែអូ