រាជធានីភ្នំពេញ ៖ នាព្រឹកថ្ងៃទី៣០ ខែមីនា ឆ្នាំ២០២១នេះ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានគូសបញ្ជាក់ថា ទោះបីកម្ពុជាបានទទួលវ៉ាក់សាំងជំងឺកូវីដ-១៩ជាបន្តបន្ទាប់ តែគំរាមកំហែងនៅតែមានកម្រិតខ្ពស់ ទាមទារឲ្យប្រជាជនអនុវត្តវិធានការ “៣ការពារ ៣កុំ” ឲ្យបានម៉ឺងម៉ាត់។
តាមរយៈបណ្តាញទំនាក់ទំងសង្គមហ្វេសប៊ុក សម្តេចពិជ័យសេនា ទៀ បាញ់ បានលើកឡើងថា បើទោះជាកម្ពុជា បានទទួលវ៉ាក់សាំងការពារជំងឺកូវីដ-១៩ ជាបន្តបន្ទាប់ ហើយបាននិងកំពុងចាក់ជូន មន្ត្រីរាជការ កងកម្លាំងប្រដាប់អាវុធ ប្រជាពលរដ្ឋជារៀងរាល់ថ្ងៃ ក៏ការគំរាមកំហែងនៅតែមានកម្រិតខ្ពស់ ដោយហេតុថា ព្រឹត្តិការណ៍២០កុម្ភៈ មិនទាន់បានបិទបញ្ចប់នៅឡើយ។
ជាមួយគ្នានោះ សម្តេចពិជ័យសេនា ឧបនាយករដ្ឋមន្ត្រី បានបន្តអំពាវនាវ ដល់ប្រជាជនទាំងអស់គ្នា បន្តចូលរួមអនុវត្តឱ្យបានម៉ឺងម៉ាត់បំផុតនូវវិធានការ “៣ការពារ ៣កុំ”។

សូមបញ្ជាក់ បើតាមប្រភពព័ត៌មានពី ទូរទស្សន៍ជាតិកម្ពុជា នារាត្រីថ្ងៃទី២៩ម្សិលមិញនេះ បានបញ្ជាក់ថា នៅថ្ងៃទី ៣១ ខែមីនា ឆ្នាំ២០២១ ខាងមុខនេះ រដ្ឋាភិបាលសាធារណរដ្ឋប្រជាមានិតចិន តាមរយៈក្រសួងការពារប្រទេស នឹងផ្តល់ជូនវ៉ាក់សាំងសុីណូហ្វាមបង្ការជំងឺកូវីដ-១៩ ដែលជាជំនួយឧបត្ថម្ភលើកទី២ ចំនួន ៧០ម៉ឺនដូស ជូនក្រសួងការពារជាតិព្រះរាជាណាចក្រកម្ពុជា ដែលជំនួយឧបត្ថម្ភនេះនឹងដឹកតាមយន្តហោះរបស់កងទ័ពជើងអាកាសសាធារណរដ្ឋប្រជាមានិតចិន៕